सोडचिठ्ठीच्या वाढदिवसाची प्रेरणा

सोडचिठ्ठीच्या वाढदिवसाची प्रेरणा

श्रीमती राणी मुखर्जी या श्रीयूत आदित्य चोप्रा यांच्या प्रेमात पडल्यापासून मुकरु एडका कोवा यांचा हरा भरा दिल,उन्हाळ्यात करपलेल्या ज्वारिच्या शेतासारखा झाला होता.श्रीमती राणी यांना ही अवदसा कां व्हावी असा सवाल मुकरुने किमान 200 वेळा स्वत:ला विचारला.या सवालाचे उत्तर राणी की आदित्य यांच्याकडून येणे अपेक्षित असल्याचे हे मुकरुस ठरवता न आल्याने अद्याप तरी त्याचे उत्तर प्रलंबित आहे. गेल्या दोन महिन्यापासून मुकरुने  राणी यांचा नाद सोडून दिला आहे.असे असले तरी दिलके तुकडे हजार हुवे कुछ इधर गिरा कुछ उधर असे काही त्याच्या बाबतीत घडले नाही,हेही तितकेच खरे.कारण राणी गेली तर एखादी महाराणी येईल हा त्याचा आत्मविश्वास होता.झालेही तसेच. त्याच्या घरी परवा श्रीमती कॅटी होम्स यांचे छायाचित्र माजघरात लावले जात असताना मुकरुने बघितले.त्याच्या दिलात आंबा मोहरला.

कॅटी,राणी नसेलही पण ती वर्षभरापूर्वी टॅाम क्रुझ नामे हॉलिवूड सुपरस्टारची महाराणी होतीच की.टॉम क्रुझची लोकप्रियता ही अमिर-शाहररुख-सलमान खान,ह्रतिक रोषण,अजय देवगण आणि अक्षयकुमार यांच्या एकत्रित लोकप्रियतेपेक्षा किमान 10 पट मेाठी आहे. अशा सुपर-ड्यूपर मेगास्टारची बायको ही एखाद्या महाराणीसारखीच की!

अशा कॅटीची छबी माजघरात लागल्याने मुकरु सैरभैर झाला. कारण त्याच्या बायकोने- सुखाबाईने ती छबी लावली होती.संतोषी मातेची,जंग्यो देवीची छबी सोडून कॅटीची छबी सुखीने कां लावली असावी,याचा किडा मुकरुच्या डोक्यात वळू लागला. तिच्या मायचा फोटो सुखाबाईने लावला असता तर त्याचे मुकरुला काहीच वाटले नसते. रडत कुथत कां होईना त्याच्या मायचा फोटो लावला असता तर त्याने तिचा गालगुच्चाच घेतला असता. चुकूनमाकून राणी मुखर्जीचा फोटो लावला असता तर घट्ट मिठीच मारली असती. पण कॅटीचा फोटो सुखाबाईने लावल्याने त्याचं दिल आणि डोकं मात्र काविळीसारखं पिवळं फटफटित झालं. पाकिस्तानी आयएसआयच्या किंवा रशियाच्या केजीबीचा तर हा डाव नसेलना असेही त्यास वाटून गेले. आपल्याला एटापल्लीच्या बाहेर कुत्रं विचारत नसताना सुखीला कोण कशाला मास्कोत मस्का मारेल,आणि इस्लामाबादेत पाव देईल? त्याला पडलेल्या प्रश्नाचं उत्तर त्यानेच स्वत:ला देऊन टाकलं.

आणि एके दिवशी सुखाबाईने कॅटीच्या फोटोला हार घालून पंचारतीने ओवळताना त्याने बघितले आणि तो बेशुध्दच पडला. मोहाचीचे दोनचार खंबे रिचवल्यावरही तो कधी बेशुध्द पडला नव्हता. शुध्दीवर आल्यावर सुखाबाईने त्याने न रिचवलेल्या मोहाचीचा उध्दार केला.मुकरुने सुखाबाईचा मोहाचीच्या बद्दलचा गैरसमज दूर करण्याचा प्रयत्न केला तेव्हा सुखाबाई हसायला लागली.मुकरु बुचकाळ्यात पडला.

सुखे,तू कायले माही परीक्शा घेते.सांगून टाकना तू या फोटोले कावून हार घातला आन ओवाळलं तं.

सरंपच सायेब, ह्यो कॅटीबाई आमच्यासाठी लय पेरनादायी हायेत.

कोन्ती पेरना दिली.

आवो,कॅटीबाईनं तिच्या नवऱ्याले सोडचिठ्ठी देल्ली.

त्यायचा संसार तुटला मनून तुले आनंद झाला का..

मले त्याचा आनंद कावून होइन बॉ.

मंग.

त्यायच्या सोडचिठ्ठीले परवा एक वर्स झालं,न कॅटीबाईन या एका वर्साचा वाढदिवस साजरा केला.त्याचा मले आनंद झाला.बाई असी खमकी पायजेल.सोडचिठठी देल्यावर रेहकत बसली नायी. सोडचिठ्ठीचीबी सेलिब्रेशन केलं.‍ि

म्हनून तू तिच्या फोटोले ओवळलं.बोहारीन कुठची.

तुमी, नायी तं तुमची माय असलं बोहारिन.कॅटीबाईले असं बोलला तं याद राखा..सुखाबाई गरजली.

कॅटीबाईची प्रेरणी लय पॉवरफूल असल्याची खात्री मुकरुला पटली. हीच प्रेरणा घेऊन सुखाबाईने आपल्याला सोडचिठ्ठी दिली अन त्याचा वाढदिवस साजरा केला तं इलेक्शनमध्ये आपली पुंगी वाजलीच म्हणून समजा हे चाणाक्ष मुकरुने चटकन ओळखले आणि त्याने कॅटीबाईच्या छबीला दंडवत घातला.

000

चांगल्या कामाची सुरुवात घरापासून

   चांगल्या कामाची सुरुवात घरापासून

    मुकरु एडका कोव्यास शास्त्रज्ञ मंडळींचा भयंकर राग यायचा.गप्पा छाटाव्या,मोहाची चढवावी,झिंगे ओरपावे,जवानी दिवानी करावी,अशा झक्कास गोष्टी सोडून ते बकवास गोष्टीत वेळ दवडतात. याच्यात डोकं घाल,त्याच्यात नाक खुपस,असे करतात नि मग त्यांच्या हाती जे काही लागतं त्याला संशोधन असे सांगून पाठ थोपटून घेतात.आख्खा जन्म अशा उपदव्यापात घालवलेल्या मंडळींचा शास्त्रज्ञ म्हणून गौरव होतो.याचा मुकरुला भयंकर त्रास होई. हे सारं झालं भूतकाळातलं.पण परवा मात्र मुकरु एका नव्या संशोधनानं हरखून गेला.या संशोधकांच्या संशोधनामुळे मुकरुचा शास्त्रज्ञांकडे बघण्याचा पिवळा दृष्टिकोन पांढरा झाला.आपली ही भावना व्यक्त करण्यासाठी त्याने ग्रामसेवकाला पार्टी दिली.पार्टिचा खर्चही मुकरुने केला.ग्रामसेवकाला हा धक्का होता.सूर्य कधी कधी पश्चिमेकडे उगवू शकतो,याची त्याला खात्री पटली.सरपंचाला नक्किच आमदाकीचं तिकिट पक्क झालं असलं पाहिजे असं वाटून त्याने मुकरुचे अभिनंदन केले. ग्लासात दुसरा पेग ओतत म्हणाला.

    मले,मगापासून एक प्रस्न पडला तो इचारु का..

    एक कावून,दहा हजार प्रष्न इचार.

    आमदारकीची तिकिट भेटली काजी तुमाले..

    आमदारकीले कोन चाटते.सरपंच गावचा राजा.जसा आपला दोस्त बराक ओबामा हाये.

    तो त्याच्या गावाचा नायी,त्याच्या देस्याचा राष्ट्रपती आहे.

    सरपंच सुद्दा त्याच्या गावाचा राष्टपतीच असतो.

    मंग तुमाले पार्टी मनवण्याएवढा आनंद कशापायी झालाजी.

    आज,मले या शास्त्रज्ञायचं लय कौतुक वाटाले लागलं.

    कावूनजी, तुमालेतं त्यायचा लय राग यायचा.आज तुमाले कसा का प्रेम दाटून आला.हे मणजे ओबामा सायबाले लादेनबद्दल प्रेम दाटून आल्यासारखं वाटतजी.

    मानसाचे इचार सारखे बदलत राह्यले पायजेल असं सिरोंच्याच्या रामदास बुवानं नाही का सांगितलं.

    मंग..

    मनूनच तं आजच्या पेपरातली शास्त्रज्ञायची बातमी वाचली नं माहं त्यायच्या बद्दलचे इचार बदलले.

    बातमीमंदी काय हायेजी.

      ग्रामसेवकाने विचारलं.मुकरुने त्याला आजचा पेपरच दिला.बातमी दाखवली.बातमी न्यूयॉर्कवरुन आली होती.न्यूयॉर्कच्या शास्त्रज्ञांना असा शोध लागला की,पुरुषांपेक्षा महिलांना राजकीय समज कमी असते.त्यांना राजकारण फार कळत नाही. ग्रामसेवकाने ही बातमी वाचली.तो बुचकळ्यात पडला.न राहवून त्याने विचारले..

    या बातमीमध्ये तुमाले एवढा आनंद होनारी कोन्ती गोश्ट दिसली.

    शास्त्रज्ञायच मनन काय, तं बायकायले राजकारन फारसं समजत नायी.

     पन या बातमीनं तुमचं मत कावून बदललं बाँ.. माही बायको सुखाबाई,तिले लय वाटाले लागल ना की माह्यापेक्शा तिले राजकारन  जास्त समजते.तेच्यात पुन्हा 33 टक्के आरक्सन आले.तिची भूनभून चालली असते का तिले आता गरामपंचायतीच्या इलेक्सनले उभ राहाचं नं मंग सरपंच व्हाचं.

    चांगलं हाये नाजी.वयनी हुस्यारच हायेत.

    तिची हुस्यारी माह्या मुळावर येत नाही का...

    मंग..

    मंग काय,या शास्त्रज्ञायचे संशोधन आता फुडं करीन तिच्या न सांगन की बघ तुले जरी वाटत असलं का,तुले राजकारण लय कयते.पन शास्त्रज्ञायचा शोध तसा नाही मनत.ज्याले राजकारनाची समज कमी हाये त्याने गरामपंचायतीच्या इलेक्शनले उभ राहून हात दाखवून अवलक्सन कशाले कराचा म्हणतो..

    म्हनजे या बातमीचा उपयोग तुम्ही वयनीले इलेक्सनले उभे राहन्यापासून रोखाले कराल.

    ती माही सत्रू थोडीच आहे.हे शास्त्रज्ञ भी माहे सोयरे नाही ना.त्यायले असा संशोधन कराची सुपारीबी देल्ली नव्हती.पन त्यायन हा सोध लावला.त्याचा काही उपेग चांगल्या कामासाठी झाला पायजेल.शास्त्रज्ञ लोक त्याचसाठी डोकं फोड करते का नाही.आतापर्यंत मले तसा वाटत नवता आता ही बातमी वाटून माहं मत परिवर्तन झालं.आन चांगल्या गोष्टीची सुरुवात आपल्या घरापासून करा लागते नं..मुकरु म्हणाला..ग्रामसेवकाने स्तब्ध होऊन मोहाचीचा आखणी एक पेग रिचवला..

महाराणीच्या पडनातुची कुंडली

महाराणीच्या पडनातुची कुंडली

   मुकरु एडका कोव्याचा बापाच्या आजोबाच्या आजोबानं लिहून ठेवलेलं भविष्य खरं उतरलं होतं. महाराणीचा अंमलाचा बिगूल वाजला आणि 1857 ची आवृती असलेल्या आजोबांनी एका भूर्जपत्रावर लिहून काढलं की एक दिवस महाराणीच्या सिहांसनावर बसणारा सुपुत्र हा  हिन्दुस्थानी वंशाचा राहील. 1857 मधील महाराणीच्या  सैनिकांना आपली भविष्यवाणी पसंत पडणार नाही ,ते आपल्याला बुकलतील म्हणून त्याने जंग्योदेवीच्या मंदिरात हे भूर्जपत्र सुरक्षित ठेवले. मरणाच्या पंधरा दिवस आधी त्याच्या पोराकडे हे भूर्जपत्राचं गुपित सुपूर्द केलं.अशाप्रकारे ते सुपूर्द होत होत मुकरुकडे आलं.

   भैताड लेकाचे,असा सर्व आजोबांचा उध्दार करत त्याने हे भूर्जपत्र कोनाड्यात ठेवून दिले.पण परवा ती बातमी आली.त्याने जंग्योदेवीकडे धाव घेतली.तिच्या पायावर डोके ठेऊन सर्व आजोबांना भैताड म्हंटल्याबद्दल क्षमा कर अशी विनवणी केली.

   जंग्योदेवीचा कौल घेऊन तो ग्रामपंचायतीत आला.ग्रामसेवकला त्याने ते भूर्जपत्र दाखवले.ग्रामसेवकाने मोठ्या कौतुकानं सरंपच मुकरुकडे बघून त्याचे पाय धरले.

   कावून बाँ,मुकरु म्हणाला.जे कायी केलं ते माह्या घराणातल्या आज्यानं केलं.

   सरपंच सायेब,तुमी आता त्याचे क्रेडिट घेऊ सकता. कोन पयले क्रेडिट घेतो याचाच जमाना हाये.

   तुले का मनाचं हाये.

   तुमचा कोणता तरी आजा आजच्या जमान्यातल्या डीएनए -फिएनचा अभ्यास-बिभ्यास करनाऱ्यापेक्शा लय हुशार व्होता. त्याले भविष्यातलं दिसत होतं.तवाच त्याने असं लिवून ठेवलं का नायी.

   बराबर हाये.

   अस्या हुस्या र आजोबाच्या कुळातले तुमी.ती हुशारी तुमच्यापरयंत आली नसन का?

   बराबर.पन या हुस्यारीचं मी रायतं घालू सकत नायीना आज.

   तुमच्या आजोबाले भविष्यात बघन्याची दूरदृष्टी व्होती, हे या भूर्जपत्रावरुन सिद्द होते.

   त्याचा मले काय फायदा..

   राणीच्या नातवाले होनाऱ्या पोट्याचं भविश्य कसा राहील?त्याच्या कुंडलित काळसर्प योग आहे का?त्याचा चंद्र पॉवरफूल आहे का?कुंडलितल्या सूर्य ग्रहावर राहूची छाया पडली आहे का?कुंडलिच्या पाचव्या घरातच सर्व पाप ग्रहांची गर्दी झाली आहे  का? त्याने कोनत्या वर्सी नासकात येऊन नारायन नागबळी यज्ञ केला पाहिजे,पुन्यातल्या कोनत्या मारुतीले दर सनवारी भेट द्याले पायजे? असं समंद तुमाले सांगता येईल का नायी.महारानीच्या नातवाचं भविष्य तुम्ही सांगितलं मनजे तुम्ही राज-ज्योतिशी व्हनार का नायी?

   पन त्यानं माहा काय फायदा.

   सायेब,लवकरच इलेक्शनचा टैम येनार हाये आपल्या देशात.तुमी महाराणीचे राज-ज्योतिषी म्हनल्यावर सगळे तुमच्याकडेच धावत सुटतील त्यायच भविष्य बघाले.मंग तुमच्या चारो उंगली घीमेच जानार की नायी.

   पन महारानीले कोन सांगनार माह्या आजोबाच्या भूर्जपत्राचा महिमा.

   त्यायची कायजी तुमी कावून करताजी.आपला एक दोस्त हाये मंबईचा डबेवाला.

   मंग..

   या मंबईच्या डबेवाल्याच्या लय प्रेमात हाये महाराणीचा लेक प्रिन्स चार्लस्.तो आपल्या देसी आला का त्याले ताजमहालची आठवन येत नायी पन डबेवाल्याचीच येते.तो मंबईत आला का पहले शायरुक खान,कटरिना फटरिनाले भेटाले जात नायी तं पयले या डबेवाल्यालेच भेटते.त्यानं त्याच्या लग्नाले बी डबेवाल्याले बोलावलं होते.अस्या या डबेवाल्याच्या मार्फत आपन आजोबाचं भूर्जपत्र पाठवून देऊजी.तुमी-आमी आपल्या बायकांवर जेवढा इस्वास ठेवत नायी तेवढा इस्वास हाये राजकुमाराचा या डबेवाल्यावर..डबेवाल्याकडून भूर्जपत्र आले मनल्यावर तो धावत येईन इकडे.तुमची भेट घडवून आनिन मी.मंग तुमी त्यायले सांगजा त्यायच्या नातवाचं भविष्य.कुंडली हिन्दुस्थानातच बनते.हिंदुस्थानी वंशाच्या पोराचं भविष्याची कुंडली एक हिन्दुस्थानी नाही मांडनार तं मंग का अरब मांडनार.?तुमीच सांगा..

   आपल्या स्मार्ट ग्रामसेवकाकडे मुकरु चकित होऊन किती तरी वेळ बघतच राहिला...