टूर अंबाणी दादांच्या महालाची

टूर अंबाणी दादांच्या महालाची

    अंबाणी दादांच्या महालाची फार चर्चा होत असते. त्या चर्चेमुळे आग्य्रातील ताजमहल आणि वाशिंग्टन येथील व्हाईट हाऊस हे राजवाडे कम महाल फिके पडण्याची शक्यता निर्माण झाली आहे. शिवाय या दोन्ही महालांची नव्हाळी कमी झालेलीच आहे. ताजमहलाचं दर्शन बिल क्लिंटन पासून ते बाबूराव कोटलवार  आणि  मिशेलवहिनी ओबामा पासून मंगलाताई ओतारे यांच्यापर्यंत कुणीही,कधीही घेऊ शकतात. व्हाइट हाऊसच्या दर्शनाला सुश्री मल्लीका शेरावत जाऊ शकतात याचा अर्थ आपण-तुपणसुध्दा कधी ना कधी जाऊ शकतोच की !

    पण, ज्येष्ठ अंबाणी दादांच्या राजवाड्याचं तसं नाही. हा राजवाडा बघण्याची भूक केवळ इंग्रजी पेप्रातील वर्णनावरुनच भागवता येते. बिल क्लिंटन एकदा भारतात आल्यावर म्हणाले होते की ताजमहल नही देखा तो क्या खाक देखा? (आम्ही दररोज धारावी बघतो त्याचे काय? ते कोणत्याही खाक पेक्षा अधिकच की..असो.बिल भाऊंना ते कळायच नाही. त्यांना मोनिका लेंविस्की कळली नाही तर धारावी कुठून कळणार?) असो. तर बिल भौंच्या मुद्दयालाच धरुन असं म्हणावासं वाटतं की अंबाणी दादा आणि वहिनी यांचा महाल नही देखा तो क्या खाक देखा,असं राजपूत्र विल्यम आणि राजकुमारी पिप्पा मिडलटोन असं कधीतरी म्हणून, आपल्या जखमेवर मिठ चोळण्याआधी आपणास या महालाचे दर्शन घडले तर  किती बहार येईल. मात्र ही सफर कशी घडणार?

    आपण राष्ट्रपती भवनात जाऊ शकू,संसदेत जाऊ शकू,राजभवनात जाऊ शकू. इकडच्या तिकडच्या ओळखींनी हे शक्य आहे. पण अंबाणी दादांच्या महालाचे तसे नाही. त्यांच्याशी ओळखी असणारा आपला कुणीच (वाली-सुग्रिव) नाही. त्यांचा चिंरजीवांच्या वर्गात आपली कन्या किंवा कुमार नव्हते. त्यामुळे अंबाणी दादांच्या महाल दर्शनासाठी उपयुक्त ठरु शकतील असे हे मार्ग आपल्यासाठी नाहीत. इथेच एक मोठी संधी सचीन प्राजींसाठी हात जोडून उभी असल्याचं आमच्या लक्षात आलं आहे.

    ज्येष्ठ अंबाणी दादा आणि वहिनी हे दोघेही सचीन प्राजींच्या प्रेमात असल्याचं साऱ्या जगाला ठाऊक झालय. सचीन प्राजींच्या निमित्त ते बॉम्बेच्या सर्व सुपर-ड्युपर महाजनांसाठी आपल्या राजवाडा किंवा महालात संधी मिळेल तेव्हा जंगी पार्टी देत असल्याचेही आता जगाला ठाऊक झाले आहे. त्यामुळे सचीन प्राजी यांनी जर अंबाणी महालाची टुर किंवा सफर-ई-अंबाणीज अँटेलिआ पॅलेस अशा एखाद्या टीव्ही मालिकेच्या निर्मितीचा घाट घातलाच तर अंबाणी दादा आणि वहिनी नाही म्हणतील असं तुम्हाला वाटतं काय? सचीन प्राजी हे जरी चाळीशीच्या उंबरठ्यावर असले तरी ते मनाने एखाद्या बालकासारखेच आहेत. अंबाणी वहिनी या एका शाळेच्या चेअरमन असल्याने बालकांचं ह्रदय आणि मन फुलासारखं असतं ते जितकं जपाल तितकं छान,असं त्यांना नक्कीच ठाऊक असणार .त्यामुळेही त्या सचीन प्राजींना नकार देणार नाहीत.

    अशा टुर मालिका डिस्कव्हरी चॅनेल,फॉक्स हिस्ट्री वगैरे सारख्या चॅनेल्सवर सुपरहिट्ट होतात.शिवाय सचीन प्राजींच्या प्रेमात असणारे अमिताभ दद्दूजी हे गुजराथची टुर आपणास दररोज घडवत असतातच. सचीन प्राजींसठी ते त्यांचा अनुभव शेअर करणार नाहीत असं तुम्हास वाटतं काय? या मालिकेच्या शीर्षक गीत गायनासाठी सचीन प्राजींच्या प्रेमात असणाऱ्या लता दिदी किंवा आशाताई होकार देणार नाही असं तुम्हास वाटत काय ?

    अंबाणी दादांच्या महालाच्या टुर मालिकेच्या निर्मितीत सचीन प्राजी आहे असं कळताक्षणीच केसरी ,वीणा वर्ल्ड, कॉक्स ऍ़ण्ड किंग्ज, थॉमस कूक, कुओनी ट्रॅव्हल्स, या टुर कंपन्या रांगा लावतील. हक्काचा आणि घरचाच सहारा तर कुठे गेलाच नाही. सचीन प्राजी-अमिताभ दद्दू आणि लताताई या प्रिमिमय व्यक्ती या प्रिमिअम प्राडॅक्टशी संबंधित असल्याने तुम्हीच कां ही मालिका प्रायोजित करत नाही असे श्रीयुत रतन टाटा हे सांप्रतकालीन टाटा साम्राज्याचे प्रमुख श्रीयुत सायरस मिस्त्री यांना सांगू शकतील. सचीन प्राजींचं महत्व आणि माहात्म्य असं दंबंग नाही असं तुम्हास वाटत काय?

    (मोठी मालिका,मोठे प्रायोजक म्हणजे मोठी बिदागी.सचीन प्राजी तुम्ही आमच्या या सल्ल्याचा विचार कराच.शिवाय आम्ही फ्री-सल्लागार असल्याने ही कल्पना सुचविल्याबद्दल तुमच्याकडून रॉयल्टीसुध्दा घेणार नाही.सचीन प्राजी तुम्ही आम्हास इतकं दिलत तेव्हा आम्ही सुध्दा इल्लुसं तुम्हाला फ्री देऊ शकत नाही की काय?)

सचीन प्राजींसाठी बहुमोल सल्ले

सचीन प्राजींसाठी बहुमोल सल्ले

    सचीन तेंडुलकर यांनी निवृत्ती घेतली.आता त्यांनी काय करावं?हा सवाल समस्त जगाला पडला. त्यांनी काही तरी केले पाहिजेच नाही तर त्यांचे काही खरे नाही,असा त्यामागचा सदहेतू. कलियुगातच असं घडू शकतं.ते निवृत्त होत नव्हते तर ही मंडळी देव पाण्यात बुडवून ठेवत होती.त्यांनी आता निवृत्ती घेतली तर म्हणे ते क्रिकेटची जान होते.आता ही जानच गेली.म्हणजे याचा अर्थ त्यांनी निवृत्ती घ्यायला नको होती का? बरे आता त्यांनी निवृत्ती घेतली तर लगेच त्यांच्या भविष्याविषयीची घनदाट चिंता. जणू काही आता त्यांना दोन्ही वेळेच्या जेवणाचीही भ्रांत. त्यामुळे मग त्यांनी हे करावे ते करावे,असे सल्ले लगेच सुरुही झाले. आम्हासही असं वाटलं की आपणच कां बुवा मागे राहायचे. शिवाय सल्ले द्यायला डॉलर्स/येन/युरो खर्च करावे लागत नाहीत.ज्याच्यासाठी सल्ला असतो त्याने तो ऐकलाच पाहिजे,मानलाच पाहिजे असे कोणतेही घटनात्मक बंधन नाही.असे अभिव्यक्ती स्वातंत्र्य दोन्ही बाजुला असताना आम्ही मागे राहणं शक्यच नव्हतं त्यामुळे मग आम्ही सुध्दा काही सल्ले देऊनच टाकले.त्यातले निवडक सल्ले इथे पेश करत आहोत.

    1)सचीन्स रेसिपी-सचीन प्राजी हे उत्तम खवैय्ये आहेत.जगातील ज्या ज्या शहरात ते गेले,त्याठिकाणची स्पेशल डिशची चव त्यांनी चाखली.त्यांनी जेव्हा मुंबईत हॉटेल सुरु केले तेव्हा त्यासाठी असंख्य रेसिपी गोळा सुध्दा केल्या. त्यावर आधारित त्यांनी एक पुस्तकच काढावे.सचीन यांना क्रिकेटच्या मैदानावरुन अवघ्या 25 वर्षात निवृत्ती घ्यावी लागली मात्र सचीन्स रेसिपी हे पुस्तक किचनच्या मैदानावर 100 वर्षं खेळतच राहील.

    2) प्यार का फंडा-आपल्यापेक्षा वयाने खूप मोठ्या आणि शिक्षणाने त्याहून मोठ्या कन्येच्या प्रेमात कसं पडायचं  किंवा  त्या कन्येला प्रेमात कसं पाडावं,यासाठी कशी बॅटिंग करावी आणि चेंडू ऑफसाइडला जास्त टोलावायचे की ऑनसाइडला अधिक टोलावाचे हे सचीन प्राजी शिवाय कोण बरं ऍ़क्युरेट सांगू शकेल.त्यामुळे त्यांनी आता,प्यार का फंडा हे ऑनलाइन आणि ऑफलाइन प्रशिक्षण सुरु करायला करायला हरकत नाही.

    3 )रात के दो बजकर दो मिनट-गेली 24 वर्षं सचीन प्राजी हे लहान मोठ्या क्रिकेटपटूसोबत जगभरातील विविध शहरांमध्ये क्रिकेटच्या ड्रेसिंग रुममध्ये होते.हे खेळाडू मैदानावर वेगळा खेळ करतात आणि ड्रेसिंगरुमध्ये दुसरा खेळ करतात.रात के दो बजे तर हा खेळ मस्तच रंगत असला पाहिजे ना! सचीन प्राजी शिवाय हे कोण बरे सांगू शकेल.शिरीष कणेकरांच्या मदतीने त्यांनी हा एकपात्री प्रयोग सुरु केला पाहिजे.तो सुपर-ड्युपर हिट होईल यात आम्हास मुळीसुध्दा शंका नाही.

    4) ते आणि त्यांच्या प्रेमिका- गेल्या 24 वर्षात सचीन प्राजी अनेक क्रिकेटपटूंच्या प्रेमप्रकरणांचा साक्षिदार राहिले आहेत.याप्रेमप्रकणांवर आधारित महा-कादंबरी तो युवँ लिहू शकतात.त्यासाठी त्यांना घोस्ट रायटर हवे असतील तर ते मराठीत ढिगाने आहेत.त्यांनी  जस्ट हिंट देण्याचीच देरी..घोस्ट रायटरांची फौज त्यांच्या समोर हजर.

    5)विनोद कांबळीचं नेमकं चुकलं कुठं?-या विषयावर थोडा अभ्यास आणि खूप सारे पुरावे गोळा करुन सचीन प्राजी मुंबई विद्यापीठात डॉक्टरेट करु शकतो.हाच प्रबंध पुढे डी.लिट म्हणूनही स्वीकाराला जावू शकतो.

    6)व्टेंटी-व्टेंटी एक वास्तव आणि विस्तव- ही महाचर्चा सचीन प्राजी कोणत्याही दूरचित्रवाणीवर घडवून आणू शकतात.या महाचर्चेला सर्वाधिक टीआरपी आणि पर्यायाने जाहिराती मिळून त्यांचा बँकबॅलन्स शतगुणित होऊ शकतो.

    7)मी आणि माझे कॅप्टन्स,माझ्या 10 नंबरच्या शर्टाचे रहस्य,हरभजन अँग्री यंग मॅन की अँग्री मॅड मॅन,इफ आय ऍ़म गॉड देन व्हॉट अबाऊट तिरुपती बालाजी?अशा सारख्या पुस्तकांची मालिका सचीन प्राजी घोषित करु शकतात.त्यासाठी त्यांना मानधन म्हणून कोट्यवधी रुपये कोणताही प्रकाशक देऊ करेल.